Crap scalegl - in material plein bellezia naturala

Il crap scalegl, en sia fuorma naturala, inspirescha mei da formar e suandar sias lingias, ch`ein dadas gia avon milliuns dad onns. Il respect per quella materia e la marveglia da scuvierer mintga toc dat a mi satisfacziun ed a miu art siu segn caracteristic. 

Per ordinari lavurel jeu vid incaricas da differenta clientella. Da temps en temps sefatschentel jeu denton era cun in intent persunal, che dat lu a mi nov`inspiraziun en la lavur artistica. La lavur sco artista autodidacta da crap scalegl dat a mi cuntentientscha, in grondius sentiment da libertad e savens era in ruaus intern-meditativ. 
La significaziun scientifica per crap scalegl ei steatit. Quei crap consista principalmein ord ils dus minerals talc e clorit che cuntegnan magnesium e fier. Il talc effectuescha la lomezia dil crap. Silla scala da direzia da Moesch (1-10) ei crap scalegl sin 1, q.v.d. ch'ei setracta d'in crap fetg lom. El ei naven dalla peisa specifica pli grevs ch'auters craps. Crap scalegl anflan ins en differents loghens sil mund ed en differentas colurs e qualitads.
Il crap scalegl svizzer fascinescha mei adina puspei entras sia lomezia e varietad dallas colurs, da grisch, clar-verd tochen stgir-verd cun parts alvas e brinas.